ಅವಕಾಶ

ಮತ್ತೊಮ್ಮೆ ಮಗುವಾಗ ಬೇಕು ಸಿಗಬಹುದೇ ಅವಕಾಶ

ಮತ್ತೊಮ್ಮೆ ನನ್ನ ನಾನೆ ತಿದ್ದಿ ತೀಡಬೇಕು

ಮತ್ತೊಮ್ಮೆ ನನಗೆ ನಾನೆ ತಾಯಾಗಬೇಕು

ನನ್ನ ನಾನೆ ಪ್ರೀತಿಸಬೇಕು

ಇಟ್ಟ ತಪ್ಪು ಹೆಜ್ಜೆಗಳ ಹಿಂತೆಗೆದು ನಡೆಯಬೇಕು ಸರಿದಾರಿಯಲಿ

ಇನ್ಯಾವತ್ತು ನನಗೇ ನೋವಾಗದಂತೆ

ನನ್ನ ನಾನೆ ಪ್ರೀತಿಸಬೇಕು

ನೋವು ಕೊಟ್ಟವರ ಕ್ಷಮಿಸಬೇಕು ಒಮ್ಮೆ

ಹೊರಗಿಡಬೇಕು ಒಂದಷ್ಟು ಜನರನ್ನು

ಮತ್ತೊಮ್ಮೆ ನನ್ನ ನಾನೆ ತಿದ್ದಿ ತೀಡಬೇಕು

ತಾಯಾಗಬೇಕು ನನಗೆ ನಾನೆ

ಸಿಗಬಹುದೆ ಅವಕಾಶ!

ಮಾಯೆ ಏನಿಲ್ಲ

ದೇವರಂತೂ ಕಾಣಲ್ಲ

ದೃಷ್ಟಿ ಹಾದಷ್ಟೂ ದೂರ ಎಲ್ಲರ ಮುಖದಲ್ಲೂ ನೋವಿನದ್ದೊಂದು ಗೀರು

ನಗುವೇನೋ ಸಾಂಕ್ರಾಮಿಕ

ಒಮ್ಮೆ ಬಂದರೆ ಮರುಕ್ಷಣಕ್ಕೆ ಸಾವಿನ ಸೂತಕ!

ಸಿಗಬಹುದೆ ಇನ್ನೊಂದು ಅವಕಾಶ

ಜಿಗಿದಷ್ಟೆತ್ತರವೆ ಕೊನೆಯಲ್ಲ ಮನಸಿಗಿದರ ಅರಿವಿಲ್ಲ

ಕ್ಷಣಿಕ ಖುಷಿಗಳೆ ನಿಜವೆನ್ನುವ ಮೂರ್ಖ ಮನಸು ಮುಗ್ಧತೆಯಲ್ಲ

ಈ ಕ್ಷಣವೆಲ್ಲ ಚಿಂತೆ ಇನ್ನೊಮ್ಮೆ ಸಿಗದ ಸಮಯದ ಅರಿವಿಲ್ಲ

ಸಿಗಬಹುದೆ ಅವಕಾಶ

✍🏻ವಿನುವೇದ